Freeze

“Copy. Dito sa maliit na itlog, may manaka-nakang tango.”

Kakaiba language nina kuya UV Driver. Filipino naman, pero di ko maarok? Suki na ko ng PUVs na vans dahil yun ang sinasakyan ko every freaking weekday ng buhay ko this year. Pero anyare, di ko parin gets?

In fairness, ang ganda isipin na, wow, nagmeeting kaya sina kuya (at ate, kung meron man) para mag-set ng sarili nilang codes? Pano kaya nila naestablish na ganito-ganyan ang gagamiting salita as substitutes para sa ganito-ganyan? Nag general assembly kaya sila per chapter tapos votation ng bet nilang codes? May pamphlets na naglalaman ng compilation ng codes-meaning a la dictionary kayang binibigay sa bagong drivers? Paano kaya nila naderive from those words yung gusto nilang codes?

Ang galing lang. Pamilyar tayo sa mga salitang ginagamit nila, pero parang hindi natin makuha ang logic ng mga pangungusap nia binabanggit nila. Na-exclude tayo ng isang komunidad gamit ang sarili nating salita.

“Copy. Dito sa maliit na itlog, may manaka-nakang tango.”

Nung nasabi to ni kuya, isang imagery agad pumasok na isip ko.

Poorly-lit dance studio. Yung ilaw parang yung sa interrogation rooms, yung yellowish light tapos nagsiswing yung light bulb left and right. Biglang may lalaki at babaeng magtatagpo sa gitna ng kwarto. Dahan-dahang lalapit sa isa’t isa, may pilantik ang mga paa sa bawat hakbang. Si kuya, slender at nakapolong itim at slacks. Bukas ang polo nya kaya kita ang medyo may prominent pecs na dibdib. Halatang kinakabahan. Namumuo ang maliliit na butil ng pawis sa may noo, pero hindi niya to pinupunasan. Si ate, balingkinitan, pero kamukha ni Kim Sam Soon. Nakapulang sleeveless na damit, putok na putok ang lipstick, parang mga labi ng mga babaeng nananampal sa mga telenovelas. Ready makipagsagupaan. Matalim ang tingin sa kasama, halatang inip na na magprogress ang sequence ng image sa utak ko.

At dahan-dahan nilang pinaglapit ang kanilang mga kamay. Ramdam ang tensyon. Pawisan na ang mga kamay, pero gusto na matapos ang kaba sa unang entrada. Nang maglapat ang kanilang mga palad at magtagpo ang mga mata, sa isang mabilis na galaw, ay biglang tumingin nang seryoso sa imaginary camera kung saan ako’y nasa likod.

Sabay freeze ng moment.

Cut.

“Manaka-nakang tango.”

Advertisements